Forsætisráðherra lagði blómsveig að leiði ráðherra

Davíð Oddsson, forsætisráðherra, lagði blómsveig að leiði Hannesar Hafstein og eiginkonu hans, Ragnheiðar Hafstein í kirkjugarðinum við Suðurgötu 1. febrúar síðastliðinn í tilefni þess að 100 ár voru liðin frá því þjóðin fékk heimastjórn. Fjölmenni var í kirkjugarðinum og félagar í Karlakór Reykjavíkur sungu.

Um leið og ráðherra lagði áherslu á að persónudýrkun væri ekki við hæfi, þá sagði hann það mikla giftu að mikilhæfur maður hefði sest í embætti ráðherra með heimastjórn 1904. Hannes Hafstein hefði verið farsæll í starfi, átt stóran þátt í hve giftusamlega heimastjórnin tókst og verið stökkpallur til fullveldis 1918 og sjálfstæðis 1944.